Psa 10 | HUI | STEP | Anduane Homogo-o irane aginaga ina helalu í̠ kaundia kebe. Ko ina kamaria íbu ngagola í̠ ha do ho kego irane agibe.

a 10.2Iba 7.16, 9.15, Min 5.22

b 10.3Iba 94.4, Lm 1.32

c 10.4Iba 14.1-2, 53.1

d 10.5Iba 12.5, Ais 26.11

e 10.6Ais 56.12, Mo 18.7

f 10.7Yob 20.12, Iba 12.2, Lm 3.14

g 10.8Iba 17.11, Hab 3.14

h 10.9Iba 17.12, Mai 7.2

i 10.11Yob 22.13, Iba 94.7, Ese 9.9

j 10.14Iba 68.5, 2 Ti 1.12, 1 Pi 4.19

k 10.16Iba 145.13, Yar 10.10, Dan 4.34, 1 Ti 1.17

l 10.17Har 22.23, Iba 9.12

m 10.18Iba 82.3, Ais 11.4

Psalms 10

Anduane Homogohanda biamogo bilonaga bi lenego ogo

1 Anduane Homogo-o irane aginaga ina helalu í̠ kaundia kebe.
Ko ina kamaria íbu ngagola í̠ ha do ho kego irane agibe.
2 Wali agali mini kowi karume mine halu
wali agali yagibano karu mo ko hole talima ibaga bialu ka.
Tigua uli tombo wuwa maru uli pelo ngaria
habo lalu tini uli ogoniha uli pelo hame ledo. ^a

3 Wali agali ko biagarume tinaga miniha mana ko hame lararunaga mine haga ka.
Mbiralime mbirale bu ngaru dimagoli hai haga karume
Anduane Homogohondo bi ko lalu erembira miaga ka. ^b
4 Wali agali ko karume Anduane Homogo mitangi nabiaga ka.
Tigua mine howa lalu,
Ngode Datagaliwabe ibugua i̱ ko birugonaga pani nangulebira, laga ka. ^c

5 Mini kowi karume biraru damene bibahende mbirale dewa mo mogo biaga ka.
Anduane Homogo-o í̠naga mini wu kego ti manda nabiore kagoni.
Tigua tinaga waitigi karu mege biaga ka. ^d
6 Tigua hangu hangu mitangi bialu,
I̱ hongoheore kogoni.
Mbirale tara tara ngarume i̱ bope naholebiraore.
I̱ kogoha genda mbira anda naibulebira,
lo mitangi biaga ka. ^e
7 Bibahendengi tigua bi ko laabo halu maru karu ha haga ka.
Ke̱ howa mendeali kago mo gi hole bi laabo haga ka.
Mana ko bulenenaga bi ko ngaru
tigua abale yamialu lo pebe bialu haga ka. ^f

8 Wali agali ko ogonidagua biaga karume
wali agali maru bayale kago bo wahole
ohowa harigani bira do haga.
Mbirali hongo nahe kago mo ko hole
ohowa harigani bira do haga ka. ^g
9 Laionome ibu nagane ale ibirago balu nole
ohowa yu biragadagua ti biraga ka.
Wali agali yagibano porago minule
harigani ohowa yu biraga ka.
Ibalu karia gono wiyagoha do ngaria
abale hado yalu piaga ka. ^h

10 Tigua hendore oho biruwa
tinaga hongo timbuni daligaorehe kagome
mbirali hongo nahe kago abale mo ko haga ka.
11 Wali agali ko urunibi karu tigua lo manda bialu,
Mana i̱na berogo Ngode Datagaliwabe ibu mitangi nabiaga kagoni.
Ibu de muguliho kagonigo
i̱na berogo de nahondolebira ndobe,
laga biaga kagoni. ⁱ

12 Anduane Homogo-o í̠na ko biaga karu bole
í̠naga gi yaraga howa nende biaho habe.
Ngode Datagaliwabe-o í̠na hongo nahe karu biamogo bule embeda nahabe.
13 Wali agali ko biaga karume
Ngode Datagaliwabe í̠ mege bialu erembira ngiaga kagoni.
Tinaga miniha lo manda bialu,
I̱na ko berogonaga pani nangulebira, laga biaga kagoni ndobe.
Mini urunibi wiaga karuni í̠na bo wahai habe nahedane kebe.

14 Í̠na wali agali ko biaga urunime mana biaga ngago ^j
manda biaiho ke.
Ko urunibi kagome wali agali maru bu karu genda mo miaga ngago damene
í̠ manda biaiho kegoni.
Í̠na wali agali genda uruni yu karu biamogo biaga kegoni.
Wali agali hongo nahe karubi
waneigini aba ai̱yala homene karubi
í̠na ti biamogo biaga kego manda buwa ti í̠niha hanaho kagoni.
15 Wali agali mana ko biaga urunime ko birago mani nabilo
tinaga hongo kago bo podai habe.

16 Anduane Homogo ibu kini haluheore kagoni. ^k
Wali agali hameigini tara tara bibahende ibu mitangi nabiaga karu
ibunaga dindi ngagoria howa bo taliatagi halu ereba hai helolebira.

17 Anduane Homogo-o í̠na wali agali í̠ni andaneha karume bi larago hale howa
tinaga bu mini mo hongo harili. ^l
18 Waneigini aba ai̱yala homene karumebi
wali agali genda yu karumebi
dugu bialu í̠hondo bi lalu karu hale harili.
Tinaga godi tigabi lolene ngadagua lelo
í̠na ti biamogo bulebere.
Í̠na ogonidagua beregola
dindiali karume ti lone mo ko holene mbira nawulebira. ^m